Nagdasal muna si Judy Ann Santos bago siya humarap sa entertainment writers sa presscon ng Huwag Ka Lang Mawawala na ginanap sa Dolphy Theater noong Huwebes. Normal ang kaba na naramdaman ni Judy Ann dahil dalawang taon na ang nakararaan mula nang magbida siya sa isang teleserye.
Hindi maipaliwanag ni Judy Ann ang pakiramdam pero nagpapasalamat siya sa special treatment at pagpapahalaga na natanggap niya mula sa ABS-CBN management.
Sina KC Concepcion at Sam Milby ang ilan sa co-stars ni Judy Ann sa Huwag Ka Lang Mawawala at ayon sa kanya, nahasa nang husto ang kaalaman niya sa English language dahil sa dalawa.
“Nahasa ng bongga ang English ko, kumpara sa mga nakaraang soap na ginawa ko. With Sam, nakakabilib siya. Makikita mo kung paano siya nagpursige na mag-Tagalog, kahit hirap na hirap siya.
“Alam mong gusto niyang itawid sa mga tao na tatrabahuhin niya na makaarte nang maayos. At the same time, makapag-Tagalog. Mahirap ‘yon, ha? May moments na nagta-Tagalog siya. Mas madalas niyang ginagawa na mag-Tagalog siya pero hindi namin nire-require na kailangan puro Tagalog.
“Kami na nga ang nagsasabi na kung nahihirapan ka, Inglesin mo na lang. Ayaw niya. Matigas talaga ang ulo ng bata. Talagang nagta-Tagalog siya. Meron siyang gustong patunayan na nakakatuwa. Nakakabilib. Parang sinasabi niya na ibabalik ko naman sa inyo ‘yung pagpili sa akin doon sa papel na ito. Gusto niyang patunayan na carry niya.
“Si KC, masasabi ko talaga na perfect ‘yung role niya. It’s about time na gumawa siya ng ganitong klaseng role. Swak na swak sa kanya at with this role, masasabi ko na aktres talaga siya dito.”
“Mukha akong siopao noon!” -- Juday
Ang ABS-CBN ang nagbigay kay Judy Ann ng title na Reyna ng Pinoy Soap Operas kaya tinanong siya kung sino ang Hari ng Pinoy Soap Operas.
“ Wala akong karapatang magsabi kung sino ang King kasi ibinigay lang naman sa akin ang titulong ito. Ang may karapatan na makasagot niyan, ang management kasi sila ang nagdedesisyon kung sinuman ang mapusuan nila,” ang sagot ni Judy Ann.
In near tears si Judy Ann nang mapanood nito ang special AVP na inihanda ng ABS-CBN. Ipinakita ang lahat ng mga teleserye na pinagbidahan niya pero natawa si Judy Ann nang mapanood nito ang ilang eksena mula sa Krystala. Hindi makapaniwala si Judy Ann na nagsuot siya ng “tights” sa edad na 26 para sa mga eksena ng fantasy series na pinagbidahan niya.
Natawa ang lahat sa sagot ni Judy Ann nang tanungin ito tungkol sa realization niya matapos mapanood ang mga eksena ng kanyang past teleseryes:
“Na mukhang siopao pala talaga ako. Hindi ako dapat magreklamo sa mga nagsusulat ng ganun kasi talagang mukha akong siopao na bagong gising.”
No comments:
Post a Comment