Matapos manganak Juday niregaluhan uli ni Ryan ng singsing

ni Lolit Solis

Singsing ang regalo ni Ryan Agoncillo kay Judy Ann Santos at Daddy watch naman ang gift nito sa kanyang mister nang isilang niya ang kanilang anak na si Juan Luis a.k.a Lucho.

Ayaw sabihin ni Juday kung ilang carats ang singsing na natanggap niya mula sa kanyang dyowa pero sure ako na mamahalin ‘yon.

Nanganak si Juday noong Huwebes at kahapon ang first time na narinig ng televiewers ng Startalk via phonepatch interview ang kanyang boses mula nang isilang niya si Lucho.

Normal ang pagsisilang ni Juday sa bagets. Ibinalita niya kahapon na nakakapaglakad-lakad na siya.

* * *

Iba naman ang news ni Mommy Carol Santos, ang madir ni Juday. Si Mommy Carol ang nagbigay ng impormasyon na pabibinyagan na nina Ryan at Juday ang kanilang anak sa November.

Ang sey ni Mommy Carol, excited na ang mag-asawa na ipasyal ang kanyang apo kaya maaga ang pagbibinyag kay Lucho. May matandang kasabihan na masama na dalhin sa kung saan-saan ang isang sanggol kapag hindi pa ito nabibinyagan.