Juday at Ryan, ‘di gagawing sirkus ang binyag ng anak

October 22, 2010 

ChorBA!
by Melchor Bautista

CONSISTENT SINA JUDY Ann Santos at Ryan Agoncillo sa pagiging kakaiba nilang mag-asawa kumpara sa ibang mga sikat na artista, na kapag nag-celebrate ng kung anu-anong mahahalagang okasyon sa buhay at pamilya, halos ipinangangalandakan sa buong showbiz ang pagpapabongga. Una nga sa lahat, wala sa intensiyon nila ang magyabang. Hindi mo rin naman kasi sila mabubutasan kung tungkol din lang naman sa tunay na pakikisama bilang kaibigan ang pag-uusapan.

Welcome namang pareho kina Juday at Ryan ang maraming kaibigan. Kaya lang, alam nila sa pakiramdaman kung sino ang mga tunay nilang kaibigan, o ‘yung mga taong lumalapit at nakikipagkaibigan lamang, pero sino-showbiz lang naman sila. Napatunayan nga iyan, dahil nu’ng magpakasal sila, mga piling-piling tao lang na malapit sa kanilang pamilya na malapit din sa kanilang puso bilang mga kaibigan ang kanilang mga inimbita.

Nitong isilang na ni Juday ang anak nila ni Ryan na si Baby Lucho, marami ang nag-iisip, na baka sa dami ng mga nagmamahal na tunay na kaibigan ng mag-asawa ay napakaraming magiging Ninong at Ninang ng kanilang anak. Sorry na lang sila. Parang sampal sa gawain ng ibang artista, na kapag nagpabinyag ng anak, paramihan ng Ninong at Ninang ang laban na para bang pinagkakakitaan ang binyagan. Sa katuwiran nina Juday at Ryan na tatayong pangalawang magulang ang magiging Ninong at Ninang ni Baby Lucho, kaya hindi raw nila dinamihan ang pares ng mga kinuha nilang Ninong at Ninang. Ang nasa listahan pa lang ng magiging pangalawang magulang ng kanilang baby ay si Beth Tamayo at ang brother ni Ryan.